Այս օրը ամբողջ աշխարհի կանայք, անկախ իրենց ազգային պատկանելությունից, էթնիկ և կրոնական, լեզվամշակութային տարբերություններից, ինչպես նաև քաղաքական տեսակետներից, միավորվում են Կանանց միջազգային օրվա տոնակատարության շուրջ, որի նպատակն է պայքարը հանուն հավասարության, արդարության և խաղաղության: Կանանց միջազգային օրվա պատմությունը սկիզբ է առնում 1900-ականներից, երբ արդյունաբերական աշխարհը կանգնած էր տնտեսական զարգացման նոր փուլում, սոցիալական փոփոխությունների, երբ նկատվում էր բնակչության զգալի աճ, և սկսեցին հայտնվել արմատական գաղափարախոսությունների առաջին ծիլերը: 1908 թ.-ին ԱՄՆ-ում կյանքի տարբեր ոլորտներում կանանց նկատմամբ ճնշումը և գենդերային անհավասարությունը դժգոհության ալիք առաջացրեց աշխատող կանանց շրջանում՝ նրանց ավելի վճռականացնելով պայքարել հանուն իրենց իրավունքների, պայքարել՝ գենդերային բռնության և խտրականության դեմ: 1908 թ.-ին մոտ 15,000 կին երթով շարժվեց Նյու Յորքի փողոցներով ՝ պահանջելով կրճատել աշխատանքային ժամերը, արժանապատիվ կյանքի համար աշխատավարձ ապահովել, և, ամենակարևորը, նվաճել քվեարկելու իրավունք: 1977 թվականին ՄԱԿ-ի Գլխավոր ասամբլեան մարտի 8-ը հայտարարեց որպես կանանց իրավունքների և համաշխարհային խաղաղության օր: Հարկ է նշել, որ 1945 թ.-ին ստորագրված ՄԱԿ-ի Կանոնադրությունը միջազգայնորեն ճանաչված առաջին պայմանագիրն է, որն ընդգրկում է նաև գենդերային հավասարությունը ՝ այն հայտարարելով որպես մարդու հիմնարար իրավունք: